Heilsugæslustöðin Búðardal

Um sýnatökur

Að taka og skila þvagprufu:

Tilgangurinn með þvagprufunni ræður nokkru um það hvernig rétt er að taka hana. Algengast er að þvagsýni séu tekin til að greina annars vegar "venjulegar" þvagfærasýkingar og hins vegar klamydiusýkingar. Margt fleira kemur þó til greina og mikilvægt að sá sem hefur fengið þær ráðleggingar að skila þvagprufu fái jafnframt að vita með hvaða hætti hún skuli tekin.

Ætíð skal haft samband við lækni áður en þvagprufu er skilað, læknirinn ákveður hvort ástæða sé til sýnatökunnar og/eða annarra rannsókna. Best er að skila prufunni í til þess gerðu glasi sem fæst afhent á Heilsugæslustöðinni

Ef tilgangurinn er að greina þvagfærasýkingar eins og blöðrubólgu skal þessi aðferð notuð:

1. Best er að taka morgunþvag en einnig má taka þvag sem kastað er (3-) 4 klst. eftir síðustu þvaglát þar á undan.
2. Þvoið ytri kynfæri áður en þvagi er kastað, þvoið sérstaklega svæðið kringum þvagrásaropið. Ágætt er að þvo bara með volgu vatni en einnig má nota milda sápu og skola þá vel á eftir.
3. Kastið þvagi og takið sýni úr miðbununni, þ.e. ekki fyrstu dropana sem koma og heldur ekki það sem kemur síðast.
4. Best er að þvagprufan komist strax í okkar hendur en ef það er ekki hægt skal hún geymd í kæliskáp þangað til.

Ef ætlunin er hins vegar að taka þvagsýni (samkvæmt ákvörðun læknis) til að greina hugsanlega klamydíusýkingu gildir aðferðin að ofan að þessu undanskildu:

1. Þvagið þarf alls ekki að vera morgunþvag en þó þurfa að vera liðnar a.m.k. 2 klst. frá síðustu þvaglátum.
2. Upphafsbunan (þ.e. fyrstu 10-15 millilítrarnir) hentar best en ekki miðbunan.

Vefsmíði: Þórður Ingólfsson
Síðan var síðast uppfærð: 20. febrúar 2003